Hvað er aðventa, erum við á réttri leið, kunnum við að njóta eða erum við að sligast undan tilbúnu stressi fyrir jólin?

Orðið aðventa er dregið af latnesku orðunum Adventus Domini og hefst hún á 4. sunnudegi fyrir jóladag. Þessi árstími var lengi vel og er reyndar víða enn, kallaður jólafasta. Hér fyrr á öldum mátti þá ekki borða hvaða mat sem var, til dæmis ekki kjöt.

En hvað gerum við nú til dags á aðventunni? Í íslensku nútímaþjóðfélagi eru það fáir sem að fasta á aðventunni. Sennilega er það einmitt hið gagnstæða. Aðventan snýst meira um jólafagnaði, jólahlaðborð, jólaböll og jólagleði, allt með tilheyrandi kræsingum og gnægtum af mat og drykkjum, engu er til sparað.

Veislurnar geta svo sannarlega verið mjög skemmtilegar og það er gott fyrir alla að lyfta sér upp og hitta skemmtilegt fólk. En oft er það svo að atburðirnir eru orðnir svo margir að jafnvel þarf að skipta upp kvöldunum og rjúka á milli staða, því ekki má missa af eða sleppa því að mæta. Helgarnar á aðventunni eru svona hjá mörgum í nútímaþjóðfélagi.

Margir yfirkeyra sig í öllu þessu jólaati. Eru á hlaupum meðfram vinnu, til að kaupa inn fyrir heimilið, í jólabaksturinn, til skreytinga, matvörurnar, jólafötin, jólagjafirnar og svo jólakortin sem liggur við að séu skrifuð í bílnum á leið á milli staða, en samt er hvergi slakað, frekar bætt við til að gera enn betur og flottar en í fyrra.

Ekki má heldur gleyma jólahreingerningunni, allt verður að vera skínandi hreint í öllum hornum, skúffum og skápum. Þó þrifið sé mjög reglulega á allflestum heimilum í dag og varla sjáist til hvað verið er að gera vegna skammdegisins, þá VERÐUR að framkvæma Jólahreingerninguna. Svo eru það líka þeir sem ákveða að skipta út eldhúsinu fyrir jólin eða taka baðherbergið í gegn, líka fyrir jólin. Allt þarf jú að klárast og gera fyrir jólin.

Í þessu stressi og hlaupum gleymist oft að huga að heilsunni. Minna er borðað af hollum mat og minna er hugað að hvíld. Útivera margra verður einungis sú, að hlaupa á milli bílsins og búðanna, bílsins og heimilisins og bílsins og boðanna.

Gripið er í “eitthvað fljótlegt” til að elda fyrir börnin og svo rokið í næstu veislu og þar skína kræsingarnar á borðunum. Oftar en ekki er heldur meira borðað þar en til stóð, sér í lagi þar sem lítil næring hafði verið sett í kroppinn yfir daginn í stressinu, svo er öllu rennt niður með góðum veigum.

Slíkt kvöld þakkar líkaminn okkar sjaldnast. Líkaminn reynir alltaf að kalla á jafnvægi, og svona OF af öllu, er of mikið fyrir hann. Hvað þá ef margir dagar og mörg kvöld eru á svipaða vegu. Hve lengi getum við boðið okkur og líkama okkar þetta stressástand.  Er ekki ráð að stíga á bremsuna og horfa til beggja hliða áður en að haldið er áfram.

Nú hefur aðventan gengið í garð og við byrjuð að kveikja á kertum aðventukransinns. Eflaust eru einhverjir sem að hugsa núna, úfff ekki ég – það gleymdist á sunnudaginn. Við skulum ekki láta það valda streitu, heldur finna tíma til að setjast niður, kveikja á kertunum og njóta saman.

Veistu hvað kertin á aðventukransinum heita?

Spádómakertið
Betlehemskertið

Hirðakertið
Englakertið

Reynum að hægja aðeins á 🙂 Jólin koma, það eitt er víst, hvort heldur ALLT er tilbúið eða ekki. Setjum líka hollustu í kroppinn og reynum að hvíla okkur yfir kertaljósi og rólegheitum. Okkur á eftir að líða miklu betur ef við hægjum á, drögum úr væntingum og streitu og náum meira jafnvægi. Þá verðum við ekki jafn útkeyrð yfir hátíðarnar og njótum samverunnar með þeim sem okkur þykir vænst um.

Njótum aðventunnar og hugum að því fyrir hvað hún stendur.

Við kveikjum einu kerti á.
Hans koma nálgast fer
sem fyrstu jól í jötu lá
og Jesúbarnið er.

Við kveikjum tveimur kertum á
og komu bíðum hans,
því Drottinn sjálfur soninn þá
mun senda‘ í líking manns.

Við kveikjum þremur kertum á,
því konungs beðið er,
þótt Jesús sjálfur jötu og strá
á jólum kysi sér.

Við kveikjum fjórum kertum á.
Brátt kemur gesturinn,
og allar þjóðir þurfa að sjá,
að það er frelsarinn.

Guðný Ósk Diðriksdóttir tók saman.
www.htveir.is

 

Leave a Reply

Your email address will not be published. Required fields are marked *

Hómópatía á íslensku
Bækurnar Meðganga og fæðing með hómópatíu og Barnið og uppvaxtarárin með hómópatíu má nálgast hér og einnig sem kindle útgáfu (ebook) á Amazon.
Hómópatía á ensku
Bókin Pregnancy and Childbirth with Homeopathy er þriðja bók Heildrænnar heilsu. Hægt er að panta eintak frá Amazon og einnig sem kindle útgáfu (ebook).
Kynningar fyrir hópa

Ýmsar sérhæfðar kynningar eru í boði: Meðganga og fæðing með hómópatíu, Ungbarnið og fyrstu árin með hómópatíu, Í ferðalagið með hómópatíu, Skyndiaðstoð með hómópatíu, Sérhannaðar kynningar fyrir þinn hóp.