Í lok greinarinnar Hvað er góð heilsa – afhverju verðum við veik? kemur fram spurningin “Hvað gerist ef að við hlustum ekki?” Hér veltum við þessari spurningu enn frekar fyrir okkur og leitumst við að útskýra á einfaldan hátt,  hvernig líkaminn getur brugðist við.

Mannslíkaminn er kraftaverk, hann þekkir leiðir til sjálfsheilunar og er fljótur að bregðast við og sýna einkenni, sérstaklega á meðan að við erum yngri að árum og öll líkamsstarfsemin í fullu fjöri.

Líkaminn sýnir einkenni þegar honum er misboðið á einhvern hátt. Einkennin geta verið t.d. hiti, slímmyndun, magaóþægindi og svo mætti lengi telja. Einkennin geta verið missterk og misalvarleg og því nauðsynlegt að gera sér grein fyrir þeim og að vera meðvituð um að þau eru að segja okkur að staldra við og skoða hvað veldur ójafnvæginu. Erum við veik? Hve langt erum við leidd? og Hvernig endurheimtum við góða heilsu?

Hver og einn einstaklingur þarf að meta þessar spurningar á sínum forsendum og bregðast við þeim á sinn hátt til að koma sér aftur í jafnvægi og gefa líkamanum tækifæri til að halda sér eins ofarlega í heilsuþrepunum sjö og kostur er.

Fyrsta þrep

Heilbrigði:
Hér er viðkomandi eins heilbrigður og best verður á kosið. Líkaminn nær að verja sig fyrir umhverfinu bæði andlega og líkamlega. Jafnvægi er til staðar, líkamlega, andlega, hugarfarslega og tilfinningalega.

Annað þrep

Jafnvægi/ójafnvægi:
Hér er líkaminn farinn að upplifa ójafnvægi öðru hvoru og sýnir þá mild sjúkdómseinkenni. Í þessu þrepi er nægjanlegt að staldra aðeins við og taka því rólega í 1-2 daga og þá nær líkaminn að rétta sig við sjálfur án utanaðkomandi hjálpar. Hér er verið að tala um t.d. vægan höfuðverk, vöðvabólgu eða lítilsháttar truflun á meltingu eða tíðarhring kvenna.

Þriðja þrep

Bráðaveikindi:
Þekktasta ástandið í þessu þrepi er flensa og kvef. Oftast fylgja þessu ástandi, hiti og aukin slímframleiðsla. Hér þarf að liggja fyrir og fá nægan vökva til að næra hreinsunarkerfi líkamans. Þetta ástand gengur yfir á 5-10 dögum. Oft gefum við okkur ekki tíma til að liggja þessi veikindi af okkur og grípum til lyfja, til að flýta ferlinu sem er í sjálfu sér óþarfi, þar sem ekki er um alvarlegt ástand að ræða. Ef við hlutsum ekki og breytum engu, höldum við áfram niður þrepin og endum í síendurteknum sýkingum.

Í þessum þremur fyrstu þrepum, viljum við helst vera. Eins og minnst er á í fyrri greininni er eðlilegt og gott fyrir líkamann að upplifa slíkt áreiti 1-2 svar á ári. Eðlilegt er að vafra á milli þrepa eitt og þrjú.

Á þessum stað í þrepunum teljumst við vera við góða heilsu.

Fjórða þrep

Þrálátar sýkingar:
Í þessu þrepi er líkaminn kominn í mikið ójafnvægi og farinn að minna reglulega á sig. Hér er oft búið að stoppa eðlilega hreinsun líkamans í þriðja þrepi, t.d. með inngripi í formi lyfja og dregið hefur úr getu hans til að hreinsa sig sjálfur. Úrgangsefni fara að hlaðast upp og mikilvæg sveppa- og bakteríuflóra slímhúðar fer að raskast. Það veldur auknu álagi á ónæmiskerfið. Þetta sýnir sig með endurteknum, þrálátum sýkingum t.d. kvefi, flensum, ennis- og kinnholubólgum og hálsbólgum, sem oft er erfitt að losna við. Einnig getur það komið fram sem mikið orkuleysi og jafnvel sem þunglyndi.

Fimmta þrep

Ofnæmi og óþol:
Þetta þráláta ástand í fjórða þrepi íþyngir ónæmiskerfinu það mikið að það fer að lokum að bregðast við meinlausum efnum, sem við ættum annars að þola vel, t.d. mjólk, egg, nikkel, ryk, o.fl. Hér sýnir líkaminn veikleika og einkenni eins og t.d. frjókornaofnæmi, astma og óþoli gagnvart ýmsu sem viðkomandi þoldi áður.

Sjötta þrep

Sjálfsónæmi/hrörnun:
Á þessu stigi hefur líkaminn orðið ansi mikið að gera, bæði við að hreinsa út úrgangsefni og ofnæmisframkallandi efni. Hann nær ekki að hreinsa sig nægilega mikið þannig að úrgangsefnin byrja að safnast fyrir í bandvef, vöðvum, húð, sinum og liðum. Einstaklingur fer að finna fyrir einkennum eins og verkjum í vöðvum líkamans, liðar- og gigtarverkjum, lungna- og húðsjúkdómum. Hrörnun á sér stað í blóðrásarkerfi hans og innri líffærum, sem sýna sig t.d. með pokum eða sepum í þörmum, legsigi, skeifugarna- og magasári, blóðþrýstingsvandamálum og einnig sem stoðkerfisvandamál eins og brjósklos. Eftir langvarandi áreiti á ónæmiskerfið, getur myndast svokallað sjálfsónæmi. Þar má telja upp t.d. Crohn´s veikindi, MS sjúkdóminn og liðagigt.

Sjöunda þrep

Frumubreytingar:
Langur vegur getur verið á milli þrepa 6 og 7. Hér er ástandið orðið alvarlegt. Einstaklingur hefur ekki hlustað á varnir líkamans í gegnum tíðina, heldur haldið áfram með óbreyttri hegðun. Engin lífstílsbreyting hefur orðið og einungis verið slegið á einkennin sem líkaminn hefur verið að sýna, með inntöku hefðbundinna lyfja. Bandvefur líkamans getur ekki tekið við meiru af úrgangsefnum þannig að þau fara að þröngva sér inn í frumuna, sem hvorki fær nægt súrefni, né næringu til að losa sig við úrgangsefnin. Eftir langvarandi uppsöfnun úrgangsefna, skorti á súrefni og næringu, bugast brennslan í frumunni og hún getur breyst í krabbameinsfrumu sem lifir best í súrefnislitlu umhverfi.

Klifrað til baka upp þrepin sjö

Heilsa endurheimt:
Einungis við sjálf getum endurheimt okkar eigin heilsu. Margar leiðir eru í boði til að ná bestu hugsanlegri heilsu aftur, en það þarf að príla upp hvert þrep fyrir sig. Með þolinmæði og skynsemi, ásamt lífstílsbreytingum, verður þetta klifur upp þrepin, auðveldara. Oftast er hægt að snúa veikindum við í átt að betri heilsu, það tekur tíma og það þarf að taka jafnt á öllum þeim þáttum sem skipta okkur máli, líkamlegum, andlegum, hugarfarslegum og tilfinningalegum.

Hver og einn verður að finna þá leið sem honum hentar best. Margar leiðir eru að heilbrigði og er hómópatía ein þeirra leiða sem geta komið að góðum notum til að endurheimta heildræna heilsu.

Með þessum hugmyndum um heilsuþrepin sjö er reynt að útskýra á sem einfaldastan hátt að sjúkdómar banka ekki skyndilega upp á hjá okkur, heldur höfum við oftast fengið margar viðvaranir, en ekki hlustað! Hið óhjákvæmilega gerist þá og við förum niður hvert þrepið á fætur öðru.

Aldrei er of seint að snúa við, vilji er allt sem að þarf, ásamt því taka þá ákvörðun um að vilja hjálpa sér sjálfur. Þá fyrst fer varanlegur árangur að sjást og uppskeran verður, betri heilsa.

Lesa fyrri grein – Hvað er góð heilsa – afhverju verðum við veik.


Sjálfshjálparbækurnar Meðganga og fæðing með hómópatíu og Barnið og uppvaxtarárin með hómópatíu, er hægt að nálgast í vefsölu www.htveir.is

 

Guðný Ósk Diðriksdóttir tók saman.
www.htveir.is
www.facebook.com/HeildraenHeilsa.h2

Leave a Reply

Your email address will not be published. Required fields are marked *

Hómópatía á íslensku
Bækurnar Meðganga og fæðing með hómópatíu og Barnið og uppvaxtarárin með hómópatíu má nálgast hér og einnig sem kindle útgáfu (ebook) á Amazon.
Ný bók frá h2
Bókin Pregnancy and Childbirth with Homeopathy er þriðja bók Heildrænnar heilsu. Hægt er að panta eintak frá Amazon og einnig sem kindle útgáfu (ebook).
Hómópatíunám
Nýr skóli "Iceland School of Homeopathy" hefur starfsemi sína haustið 2017. Sendu okkur línu á h2@htveir.is og fáðu sendar allar frekar upplýsingar um námið.